ممبئی: کنگ خان کے بیٹے آریان کو سیکیورٹی وجوہات کی بنا پر خصوصی بیرک میں منتقل کردیا گیا ہے۔ جہاں انہیں اپنے والدین شاہ رخ خان اور گوری خان سے بھی ملاقات نہیں کرنے دی جارہی ہے۔
ایشیاء نیٹ نیوز کے مطابق 14 اکتوبر کو انہیں جیل کے قرنطینہ سیل سے نکال کر عام وارڈ میں منتقل کردیا گیا تھا، تا ہم اب اطلاعات ہیں کہ انہیں سیکیورٹی خدشات پر خصوصی بیرک میں منتقل کردیا گیا ہے۔ جہاں انہیں اپنے والدین شاہ رخ اور گوری خان سے بھی ملنے نہیں دیا جا رہا۔ مختلف مواقعوں پر ضمانت نہ ہونے کے باوجود اسٹار کڈ آریان کو 20 اکتوبر کو ضمانت ملنے کی امید ہے۔
رپورٹ کے مطابق ناز و نعم میں پلے بڑھے اسٹار کڈ آریان خان جیل میں اپنی زندگی کے مشکل ترین دور سے گزر رہے ہیں اور انہیں جیل کے ماحول سے مانوس ہونے میں کافی دقت کا سامنا کرنا پڑ رہا ہے۔
آریان کو گرفتار کیوں کیا گیا
این سی بی کی جانب سے کروز پارٹی منشیات کیس میں اب تک 18 مرد اور2 خواتین سمیت 20 افراد کو گرفتار کیا جاچکا ہے۔ تمام گرفتار ملزمان کو دیگر قیدیوں سے الگ بیرکوں میں رکھا گیا ہے۔