اٹک (اتحاد نیوز ) فتح جنگ کے قریب بس اور ٹرالر میں تصادم سے 5 افراد جاں بحق جب کہ 19 زخمی ہوگئے۔ تفصیلات کے مطابق فتح جنگ کے کھوڑ روڈ پر مسافر بس ٹرالر سے ٹکرا گئی، جس کے نتیجے میں متعدد افراد جاں بحق اور زخمی ہوگئے۔ واقعے کی اطلاع ملتے ہی مقامی پولیس اور ریسیکو اہلکار حادثے کی جگہ پہنچ گئے جنہوں نے لاشوں اور زخمیوں کو قریبی اسپتال منتقل کردیا گیا جہاں طبی عملے نے 5 افراد کے جاں بحق ہونے کی تصدیق کردی۔ پولیس کے مطابق شدید زخمیوں کو راولپنڈی منتقل کردیا گیا ہے جب کہ واقعے کی تحقیقات بھی شروع کردی گئی ہے۔ ابتدائی طور پر واقعہ لاپرواہی اور غفلت کا نتیجہ لگتا ہے تاہم تحقیقات مکمل ہونے تک وجوہات کے بارے میں کچھ نہیں کہا جاسکتا۔