کراچی(شوبز ڈ یسک)یپاکستان کے معروف گلوکار و اداکار علی ظفر نے گلوکارہ آئمہ بیگ کے ساتھ اپنے آنے والے پروجیکٹ ‘وے ماہیا’ کا ٹیزر جاری کردیا۔سماجی رابطے کی ویب سائٹ ٹوئٹر پر جاری ٹوئٹ میں علی ظفر نے ‘وے ماہیا’ کا ٹیزر جاری کیا جس میں وہ گلوکارہ آئمہ بیگ کے ساتھ موجود ہیں۔ویڈیو میں علی ظفر اور آئمہ بیگ کو برف پوش پہاڑوں میں ملتے اور بچھڑتے دکھایا گیا ہے۔اس کے ساتھ ہی ٹیزر میں علی ظفر کی آواز بھی شامل ہے جس میں وہ کہہ رہے ہیں کہ ‘ٹوٹ جاتے ہیں دل عشق کے درباروں میں، لوٹ جاتے ہیں عاشق برف کے انگاروں میں، سنا ہے ڈھونڈنے سے خدا بھی مل جاتا ہے، شاید ہم بھی مل جائیں اک دن تمہیں ٹوٹے ہوئے ستاروں میں’ ‘وے ماہیا’ کو سالِ نو کے موقع پر یکم جنوری 2021 کو ریلیز کیا جائے گا۔
علی ظفر نے ‘وے ماہیا’ کا ٹیزر اپنے انسٹاگرام اکانٹ پر بھی جاری کیا تھا جس کی ویڈیو کو صرف ایک گھنٹے میں 45 ہزار سے زائد مرتبہ دیکھا جاچکا ہے۔تاہم ٹیزر میں علی ظفر کی آواز کے علاوہ کوئی موسیقی شامل نہیں ہے، جس سے یہ واضح نہیں ہورہا کہ وے ماہیا ان کا آنے والا گانا ہی ہے یا کوئی ممکنہ فلم۔اس ٹیزر کو مداحوں کی جانب سے بھی بہت زیادہ پسند کیا گیا ہے اور یہ سوال بھی پوچھا گیا کہ یہ گانا ہے یا فلم تاہم دونوں گلوکاروں کی جانب سے کوئی جواب سامنے نہیں آیا۔دوسری جانب گلوکارہ آئمہ بیگ نے بھی اپنے انسٹاگرام اکانٹ پر ‘وے ماہیا’ کا ٹیزر جاری کیا اور بتایا کہ مکمل ویڈیو یکم جنوری کو ریلیز کی جائے گی۔خیال رہیکہ چند روز قبل علی ظفر نے ‘وے ماہیا’ کے شوٹ کی مختلف تصاویر اور ویڈیوز پوسٹ کی تھیں۔حال ہی میں علی ظفر نے سندھی گانے ‘الے ‘ کا ری میک ریلیز کیا تھا اور اس کے بعد انہوں نے اپنے نئے گانے ‘بھائی حاضر ہے’ کا ٹیزر بھی جاری کیا تھا۔