کراچی: لیاری کوئلہ گودام کے قریب 2 منزلہ عمارت گرنے کے نتیجے میں 2 افراد جاں بحق اور 12 زخمی ہو گئے۔
ریسکیو ذرائع کے مطابق زخمیوں اور لاشوں کو ملبے سے نکال لیا گیا ہے اور مزید افراد کے ملبے تلے پھنسے ہونے کی اطلاع بھی ہے۔
رینجرز نے علاقے کو سیل کر دیا ہے جب کہ ریسکیو اہلکاروں نے امدادی کارروائیاں شروع کر دی ہیں تاہم گنجان آباد علاقے کے باعث ریسکیو اہلکاروں کو آپریشن میں پریشانی کا سامنا ہے۔
لاشوں اور زخمیوں کو سول اور لیاری جنرل اسپتال منتقل کیا جا رہا ہے جب کہ زخمیوں میں سے کچھ کی حالت تشویش ناک ہے۔
عمارت کے گرنے سے دیگر عمارتیں بھی متاثر ہونے کا خدشہ ہے، ساتھ ہی موجود عمارت کو لکڑیوں سے سہارا دیا گیا ہے۔
ریسکیو ذرائع کا کہنا ہے کہ عمارت کے گراؤنڈ فلور پر گودام تھا جس کی پہلی منزل پر مزدور رہائش پزیر تھے جب کہ علاقہ مکینوں کا بتانا ہے کہ عمارت خالی تھی اور اس میں کوئی رہائش پزیر نہیں تھا۔