Official Web

سیکرٹری بلدیات افتخار شلوانی کو ایڈمنسٹریٹر کراچی تعینات کرنے کا فیصلہ

حکومت سندھ نے صوبائی سیکرٹری بلدیات افتخار شلوانی کو بلدیہ عظمیٰ کراچی کا ایڈمنسٹریٹر تعینات کرنے کا فیصلہ کیا ہے۔

ترجمان سندھ حکومت کے مطابق وزیر اعلیٰ سندھ نے افتخار علی شلوانی کو ایڈمنسٹریٹر کراچی میٹروپولیٹن کارپوریشن بنانے کی منظوری دے دی ہے، نوٹیفکیشن آج جاری کر دیا جائے گا۔

افتخار علی شلوانی پاکستان ایڈمنسٹریٹو سروس کے گریڈ 21 کے افسر ہیں اور اس سے قبل سندھ میں محکمہ قانون، محکمہ صحت کے سیکرٹری، کمشنر کراچی کے علاوہ وفاقی وزارت صنعت و پیداوار میں ایڈیشنل سیکریٹری بھی رہ چکے ہیں۔

افتخار علی شلوانی کا آبائی تعلق حیدرآباد سے ہے اور انہوں نے ابتدائی تعلیم حیدرآباد سے ہی حاصل کی اور لیاقت میڈیکل کالج جامشورو سے ایم بی بی ایس کیا۔

انہوں نے 1993 میں سول سروس کا امتحان پاس کر کے ڈسٹرکٹ مینجمنٹ گروپ جوائن کیا اور اس وقت افتخار علی شلوانی سیکریٹری بلدیات سندھ ہیں۔