دودھ اور گوشت کے علاوہ پروٹین سے بھرپور غذائیں

گوشت اور دودھ سے بنی اشیاء پروٹین سے مالامال ہوتی ہیں لیکن پروٹین حاصل کرنے کے اور بھی ذرائع ہیں۔

ہم میں سے بہت سے لوگ ایسے ہیں جنہیں گوشت نہیں پسند اور متعدد لوگ ایسے بھی ہیں جو دودھ پینا یا دودھ سے بنی اشیاء کا استعمال پسند نہیں کرتے۔

تو چلیں ہم آپ کو دودھ سے بنی اشیاء یا گوشت کے علاوہ چند ایسی غذاؤں کے بارے میں بتائیں جنہیں کھا کر جسم میں پروٹین کی ضرورت کو پورا کیا جا سکتا ہے۔

1۔ دالیں

دالوں میں پروٹین بھرپور مقدار میں پایا جاتا ہے۔ دالوں کی بے شمار قسمیں ہوتی ہیں جنہیں منفرد انداز میں بنا کر کھایا جاسکتا ہے۔

ماہرینِ صحت کے مطابق تقریباً ہر دال میں ہی پروٹین پایا جاتا ہے جب کہ لال اور ہری دال میں بے شمار پروٹین، فائبر، آئرن اور پوٹاشیم موجود ہوتا ہے۔

2۔ چنے

چنوں میں پروٹین وافر مقدار میں پایا جاتا ہے جسے مختلف طریقوں سے کھانے میں استعمال کیا جاسکتا ہے۔ چنوں کو پروٹین حاصل کرنے کا ایک بہترین ذریعہ بھی سمجھا جاتا ہے۔

3۔ مونگ پھلی

مونگ پھلی میں بھی پروٹین بھرپور مقدار میں پائی جاتی ہے جب کہ اس میں ایسا فیٹ (چربی) موجود ہوتا ہے جو صحت کے لیے مفید ہے۔

4۔ بادام

بادام پروٹین اور وٹامن ای حاصل کرنے کا ایک بہترین ذریعہ ہے جو کہ جلد اور آنکھوں کی صحت کے لیے بے حد معاون سمجھا جاتا ہے۔

5۔ قینوہ

قینوہ کو پروٹین سے مالامال اناج تصور کیا جاتا ہے۔ اسےخوراک میں شامل کیا جائے تو صحت پر مثبت نتائج مرتب ہوتے ہیں۔

6۔ تخم بالنگا

تخم بالنگا میں کیلوریز بے حد کم مقدار میں ہوتی ہیں جب کہ یہ پروٹین سے بھرپور ہوتا ہے اس کے علاوہ تخم بالنگا میں فائبر اور اومیگا تھری فیٹی ایسڈ بھی پایا جاتا ہے۔