Official Web

ٹی ٹوئنٹی کی تاریخ میں بنگلادیش کے ہاتھوں بھارت کو پہلی شکست

کرکٹ کی تاریخ کے ہزارویں  ٹی ٹوئنٹی انٹرنیشنل میچ میں بھارت کو بنگلا دیش کے ہاتھوں 7 وکٹوں سے شکست ہوگئی۔

نئی دلی  میں کھیلے  گئے 3 ٹی ٹوئنٹی میچز کی سیریز کے پہلے میچ میں بنگلادیش نے بھارت کو ہرا کر 20 اوورز کے میچ میں حریف ٹیم کے خلاف پہلی فتح حاصل کی۔

بنگلا دیشی کپتان محمود اللہ نے ٹاس جیت کر میزبان ٹیم کو بیٹنگ کی دعوت دی تو مہمان ٹیم کو پہلی کامیابی پہلے ہی اوور میں روہت شرما کی وکٹ کی صورت میں حاصل ہوئی۔

بھارت کے دوسرے اوپنر شیکھر دھون 41 رنز بنا کر رن آؤٹ ہوئے  جب کہ دیگر  بلے بازوں میں رشبھ پنت 27 اور شریاس آئیر  22 رنز بنا کر نمایاں رہے۔

بھارتی ٹیم مقررہ 20 اوورز میں 6 وکٹ کے نقصان پر 148 رنز بنانے میں کامیاب رہی جب کہ بنگلا دیش کی جانب سے  شفیع الاسلام اور امین الاسلام نے 2،2 وکٹیں حاصل کیں۔

ICC

@ICC

Bangladesh win by seven wickets!

A fabulous 60* from 43 by Mushfiqur Rahim guides the visitors to victory. | SCORECARD ? http://bit.ly/INDvBAN1stT20I 

View image on Twitter
797 people are talking about this

149 رنز کے ہدف کے تعاقب میں  بنگلا دیش کے اوپنر لٹن داس صرف 8 کے مجموعی اسکور پر آؤٹ ہوگئے، دوسری وکٹ پر محمد نعیم اور سومیا سرکار نے 48 رنز جوڑے تاہم محمد نعیم 26 رنز بناکر آؤٹ ہوئے جب کہ سومیا سرکار نے 39 رنز کی اننگز کھیلی۔

وکٹ کیپر مشفق الرحیم نے شاندار بیٹنگ کی، اُنہوں نے 19ویں اوور میں کفیل احمد کو مسلسل 4 چوکے بھی رسید کیے اور ناقابل شکست 60 رنز کی اننگز کھیلی جب کہ کپتان محمود اللہ  بھی 15 رنز بنا کر ناٹ آؤٹ رہے۔

یوں بنگال ٹائیگرز نے آخری اوور میں 3 وکٹوں کے نقصان پر ہدف حاصل کرلیا اور بھارت کو پہلی شکست سے دوچار کیا۔

بہترین اننگز کھیلنے پر وکٹ کیپر بلے باز مشفق الرحیم کو میچ کے بہترین کھلاڑی کا اعزاز دیا گیا۔

واضح رہے کہ دونوں ٹیموں کے درمیان ہونے والا یہ میچ آئی سی سی ٹی ٹوئنٹی انٹرنیشنل کا ہزارواں میچ تھا جس میں بنگلا دیش نے بھارت کو مات دے کر تین میچوں کی سیریز میں ایک صفر کی برتری  حاصل کرلی ہے۔

%d bloggers like this: