لاہور: وزیراعظم عمران خان نے ننکانہ صاحب میں بابا گرو نانک یونیورسٹی کا سنگ بنیاد رکھ دیا ہے۔
وزیراعظم عمران خان نے ننکانہ صاحب میں بابا گرو نانک یونیورسٹی کا سنگ بنیاد رکھ دیا ہے، اس موقع پر معاون خصوصی اطلاعات فردوس عاشق اعوان سمیت دیگر اعلیٰ حکام نے شرکت کی جب کہ تقریب میں وزیراعظم عمران خان کو یونیورسٹی کے مختلف حصوں کے بارے میں بریفنگ بھی دی گئی۔
وزیراعظم کی معاون خصوصی برائے اطلاعات و نشریات ڈاکٹر فردوس عاشق اعوان کا کہنا ہے کہ یہ سکھ برادری سے عمران خان کے ایک اور وعدے کی تکمیل ہے، کرتار پور راہداری کی صورت میں بین المذاہب ہم آہنگی کا جو بیج انہوں نے بویا ہے وہ مختلف مذاہب کے ماننے والوں میں ہم آہنگی اور رواداری کا سایہ دارشجر بنے گا۔
دوسری جانب وزیراعظم عمران خان آج لاہور میں گورنر اور وزیراعلیٰ پنجاب سے ملاقات بھی کریں گے جس میں انہیں نواز شریف کے آج ہونے والے طبی معائنے کی رپورٹس سے آگاہ کیا جائے گا۔