پشاور: خیبر پختونخوا میں نویں اور دسویں محرم الحرام کے سلسلے میں حساس علاقوں میں ٹرانسپورٹ اور موبائل فون سروس بند کردی گئی۔
محکمہ داخلہ کے ذرائع کے مطابق نویں اور دسویں محرم الحرام کو خیبر پختونخوا کے 14 اضلاع میں موبائل سروس بند رہے گی۔ 9 محرم کوپشاور صدر،اندرون شہر، پشتخرہ، نوتھیہ، حسن گھڑی، تہکال اور پچگی روڈ پر موبائل سروس بند ہوگی جب کہ یوم عاشور پر علاقہ اندرون شہر پشاور اور وڈپگہ میں رات 9 بجے تک موبائل سروس معطل رہے گی۔
مردان شہر میں یوم عاشور کو صبح 8 سے رات 10 بجے تک موبائل سروس بند رہے گی۔ علاوہ ازیں نوشہرہ کینٹ میں نویں اور دسویں محرم الحرام کو موبائل فون سگنلز معطل رہیں گے۔ ایبٹ آباد، مانسہرہ، ہری پور میں نویں اور دسویں محرم کے موقع پر امام بارگاہوں کے آس پاس کے علاقوں میں موبائل فون سروس بند رہے گی۔
ذرائع کے مطابق کوہاٹ شہر، ہنگو، کرم، اورکزئی، بنوں شہر، لکی مروت میں بھی نویں اور دسویں محرم الحرام پر موبائل سروس معطل رہے گی۔ ڈی آئی خان اور ٹانک کے حساس علاقوں میں بھی موبائل سگنلز معطل رہیں گے۔
علاوہ ازیں نویں اور دسویں محرم الحرام کے سلسلے میں پشاور کی بس سروس بند کردی گئی ہے۔ ترجمان ٹرانس پشاور کے مطابق 9 اور 10 محرم الحرام کو سروس بند رہےگی۔ تمام روٹس بشمول فیڈر روٹس پر بی آر ٹی کی سروس معطل رہے گی۔ اس دوران زو بائیسکل شیئرنگ سسٹم بھی معطل ہوگی۔